fbpx
Sat. Jul 20th, 2019

આ યોજનાને કારણે મોદી સરકાર ફરી સત્તા પર, પરિણામ પર થઈ છે સીધી અસર

મતગણતરીના એક પછી એક રાઉન્ડ પૂરા થતા હવે કેન્દ્રમાં ફરી ભાજપ સરકાર રચાશે એ સ્પષ્ટ થયું છે. ફરી એક વખત મોદી સરકાર મોટાભાગે નક્કી માનવામાં આવી રહ્યું છે. પોતાના પ્રથમ કાર્યકાળમાં મોદીએ અનેક લોક ઉપયોગી યોજનાઓ જાહેર કરી હતી. જે યોજનાનો સીધો ફાયદો ભાજપ પક્ષને પ્રત્યક્ષ કે પરોક્ષ રીતે થયો છે. જેનાથી પક્ષને ફરી એક આશા પ્રબળ બની. આ રહી એ યોજનાઓ જેણે મોદીને ફરી એક વખત સત્તામાં ટકાવી રાખવા માટે મહત્ત્વની ભૂમિકા અદા કરી છે.

કરમુક્તિ

આ વખતેના અંતિમ બજેટમાં મધ્યમ આવક ધરાવતા લોકોને મોદી સરકારે સારી એવી રાહત આપી છે. મોદી સરકારે પાંચ લાખ સુધીની આવકને કરમુક્ત જાહેર કરી દેતા એક મોટા વર્ગને રાહત થઈ ગઈ છે. જેનો ફાયદો લોકસભા ચૂંટણીમાં થયો છે. મધ્યમ આવક ધરાવતા લોકો દેશમાં મોટી સંખ્યામાં છે. મોદી સરકારના આ નિર્મણથી આ તમામ લોકોને સીધી અસર પહોંચી છે. તેથી આ લોકોએ સરળતાથી મોદીને મત આપવા માટે તૈયાર થઈ ગયા છે. આ બહોળો વર્ગ ધરાવતા લોકોએ ઈવીએમમાં કમળનું બટન પ્રેસ કર્યું હશે જેનું આ વિજયી પરિણામ છે.

મુદ્રા યોજના

વડા પ્રધાન નરેન્દ્ર મોદીએ શરુ કરેલી મુદ્રા યોજના અંતર્ગત જે લોકો પોતાનો એક બિઝનેસ શરુ કરવા માગે છે. તે દરેક વ્યક્તિને 10 લાખ રુપિયા સુધીની લોન મળી રહેશે. જોકે, પ્રધાન મંત્રી મુદ્રા યોજના અંતર્ગત મળતી લોન માટે વ્યાજના કોઈ નિશ્ચત દર નથી. માટે જ આ યોજનામાં મળતા ફંડ પર રિઝર્વ બેન્ક ઓફ ઈન્ડિયાના જુદા જુદા વિષયને લઈને નક્કી કરવામાં આવલા દરથી વ્યાજ વસુલવામાં આવે છે. વ્યાપાર માટે મળતા આ ફંડનો લોકોએ ભરપૂર ઉપયોગ કર્યો છે અને પોતાના સ્ટાર્ટઅપ શરુ કરી દીધા છે.

સુકન્યા સમૃદ્ધિ

બાળકીઓના અભ્યાસ માટે અને તેમના વિવાહ માટે સુકન્યા સમૃદ્ધિ યોજનાની શરુઆત તઈ હતી. કેન્દ્ર સરકારે બેટી બચાવો-બેટી પઢાવો સ્કિમ અંતર્ગત આ યોજનાને બાળકીઓના ભવિષ્યની સુરક્ષા માટે જાહેર કરી હતી. ગર્લ ચાઈલ્ડ સ્કિમ અંતર્ગત આ યોજનાની ખાસ વાત એ છે કે, એક વખત રોકાણ કર્યા બાદ અમુક રકમની બચત પર 8 ટકાથી વધારે વ્યાજદર મળી રહે છે. એટલે ડબલ ફાયદો. એટલે કે બાળકીને નાનપણથી જ આર્થિક રીતે સુરક્ષિત રહી શકે.

આયુષ્માન ભારત

તા. 25 સપ્ટેમ્બર 2018થી શરુ થયેલી જનઔષધી અથવા આયુષ્માન ભારત યોજના અંતર્ગત દેશના 10 કરોડથી વધારે પરિવારના લોકોને વાર્ષિક રુ. 5 લાખનું સ્વાસ્થ્ય વીમા કવચ સરકાર આપી રહી છે. જેમાં જે તે બીમારીઓના ઈલાજ માટે કુલ 1354 રુ.નું પેકેજ છે જેમાં કેન્સર, સર્જરી, કિમો થેરાપી, એડિએશન થેરાપી, બાયપાસ સર્જરી, ન્યૂરો સર્જરી, બેક પેઈન, સાંધાનું ઓપરેશન અને આંખની સર્જરી જેવા મોટા ઑપરેશનનો સમાવેશ થયા છે. સૌથી મહત્ત્વની વાત એ છે કે, આ માટે કોઈ આધારકાર્ડની જરુર નથી. માત્ર ઓળખપત્ર આપવું અનિવાર્ય છે. એટલે આ યોજનાનો લાભ લેનારાઓએ ભાજપને જરુરથી મત આપ્યા હશે.

ઉજ્જવલા યોજના

દેશના દરેક પરિવારોને મફ્તમાં એલપીજી ક્નેક્શન આપવા માટે ઉજ્જવલા યોજના વર્ષ 2016માં શરુ કરી હતી. એ અંતર્ગત ગરીબી રેખા નીચે જીવતા લોકો એલપીજી ક્નેક્શન આપવાનું લક્ષ્ય રાખવામાં આવ્યું છે. જેમાં કેન્દ્ર સરકારની ઓઈલ કંપનીઓને પ્રતિ ક્નેક્શન રુ. 1600ની સબસીડી આપવામાં આવી રહી છે. આ યોજનામાં ગ્રાહકોએ ચુલો ખરીદવાનો રહેશે. આ ખર્ચો ઓછો કરવા સરકાર ચુલો અને ગેસ બંને આપી રહી છે. ગ્રામિણ ક્ષેત્રે આ યોજના સુપરહીટ સાબિત થઈ છે. તેથી પ્રશંસા મતમાં પરિણમી હશે એવું પણ બને.

ખેડૂતોને આર્થિક મદદ

આ વર્ષના જ છેલ્લા બજેટમાં નાના અને મધ્યમ વર્ગના ખેડૂતોને રાહત આપવા માટે સરકારે ખેડૂતોને દર વર્ષે રુ. 6 હજાર આપવાનું એલાન કર્યું હતું. ત્રણ રાજ્યની વિધાનસભામાં મળેલી હાર બાદ મોદી સરકારે ખેડૂતોને મહેરબાન કરવા આ યોજના શરુ કરી હતી. જોકે, આ એક માસ્ટરસ્ટ્રોક માનવામાં આવે છે. મતદાન પહેતા ખેડૂતોના ખાતામાં રુ. 2 હજાર ડિપોઝિટ થયા હતા. પણ બજેટ બાદ આ પ્રકારની મદદને ચૂંટણીલક્ષી નિર્ણય માનવામાં આવી રહ્યો હતો. જે સાચો અને વિનર સાબિત થયો.